مسا مسا ع الناس الكويسة,او صباح الخير 


بداية سنة جديدة,وبداية سنة دراسية .. يعني لازم نبدأ صح 


انا الان سنه ثالثة جامعه يعني باقيلي هذي السنة وسنة رابعه واتخرج الحمدالله
لكن للأسف اني مازلت تايهة وما لقيت الطريقة المثالية للمذاكرة..
هالسنه قررت ابدأ صح,ابدأ من اول يوم دوام وما أأجل التفكير في المذاكرة لوقت الاختبارات
سمعت وقرأت وشفت وجربت اشياء كثيرة,لذلك سميتها " الوصفة السحرية " 


اولاً جدول المذاكرة,لا تخلي هالجدول في مخيلتك فقط..انقليها للورق
اكتبي جدولك وصمميه بنفسك,اختاري لكل يوم مادة بشششرررطط ما ينتهي الأسبوع 
الا وانتِ دارسة كل الدروس اللي اخذتيها خلال هالاسبوع 

كيف أذاكر ؟

بعطيكِ خطوتين,يمكن مرت عليكِ كثير لكن جربي تطبقيها من بداية السنة ومع اول درس تاخذيه




#Pomodoro Technique | طريقة الطماطم ..



يب يب اسمها طماطم,ولا تسألوني ليش 
لكن فكرتها ببساطة انك حتذاكري لمدة 25 دقيقة متواصلة,بشششررررططط انك ماتسوي هيرو وتذاكري اكثر من هالمدة
بإختصار لو تلاحظي خلال فترة مذاكرتك,دايماً في البداية تكوني نشيطة جداً
ومخك مصحصح وتستوعبي كمية معلومات كبيرة,وكل ما زادت فترة المذاكرة هذا المعدل يهبط
وتوصلي لأخر الوقت مو مستوعبة شي,وتسلكي للمعلومات

لذلك مذاكرة الخمس وعشرين دقيقة تقولك..
خلّي قدامك الجزئية اللي ناوية تذاكريها هاليوم,بعدين اختاري الجزيئية اللي حابة تذاكريها خلال ال25 دقيقة
مثلاً الفصل الاول الدرس الاول..او جزيئية معينه من المحاضرة
وحطي منبه لمدة 25 دقيقة,مجرد مايرن المنبه تتركي اللي بيدك
ترتاحي لمدة 5 دقائق فققققططط,وترجعي بعدها للمذاكرة لمدة 25 دقيقة
تستمري على هالحال ل4 فترات..يعني 25 دقيقة مذاكرة و5 دقايق راحة وهكذا
بعد المرة الارابعه ح تاخذي " Big Break " من ربع ل نص ساعة فقط
وترجعي لنفس الحكاية لين ما تخلصي الجزيئية اللي محددتها لليوم..

أكثر حاجة خلتني احب هالطريقة,هي اني انجز بدون ما احس بتعب
ولما اجي اذاكر ما استثقل المذاكرة 
ولا اضيع وقت طويل من يومي وفي الاخير ما استفيد شي ..






#التكرار يعلم الشطار| الكتابة 



ثاني خطوة هي التكرار,من اكثر الاشياء اللي نسمعها من الطلاب ونعيشها احنا كطلاب 
 "  اذاكر من هنا وانسى من هنا "
واكثر حاجة تزعَل لما تشوفي السؤال ع الورق وتحسي انك ذاكرتيه لكن ناسية المعلومه 
لذلك طريقة التكرار والكتابة..
خلال مذاكرتك اكتبي الاشياء المهمة,اعملي جداول للبيانات وخريطة مفاهيم
وملخص يحتوي على كل المعلومات المهمة واللي تساعدك انك تتذكري المعلومات الباقية
بدون ما تضيفي اي شي خارج المنهج..
هنا انتِ طبقتي خطوة الكتابة,ولا تعتمدي على ملخصات غيرك لانك ما حتفهميها
او ما حتساعدك تتذكريها بصورة اسرع,وتفقدي خطوة الكتابة

بعدها التكرار,لما تجي تذاكري المحاضرة او المادة مرة ثانية,قبل لا تنتقلي للدرس الثاني
راجعي الدرس الاول من خلال ملخصاتك وملاحظاتك..
لا تخافي المدة ما حتكون طويلة,لأن مخك قاعد يسترجع المعلومات مو قاعد يحفظها ويفهمها من جديد
وتستمري على هالطريقة لين ما تنتهي من المنهج كامل
التكرار يعلم الشطار..ويثبت المعلومات

على سبيل المثال سورة الفاتحة من السور اللي مستحيل احد ما يعرفها
والسبب اننا نكررها اكثر من مرة خلال اليوم
وهذا يأكد لنا ان التكرار هو الحل السحري للتذكر ..



نصائح عامة..


* خلال مذاكرتك لو تذاكري بورق,ابعدي كل الاجهزة عنك وخليكِ حازمة جداً مع نفسك
وأنسي جملة " بس اشوف الواتس او السناب .. الخ " لان " بس " ح تجرك للساعه والساعتين
ولو تذاكري بأيباد,لا تشغلي النت ابداً ابداً..ولا تدخلي نتفليكس عشان تشوفي حلقتك نزلت ولا لأ 
خليييييكِ حازمة مع نفسك


* النوت وقت المحاضرة جداً مهم,لا تعتمدي على ذاكرتك
وغالباً الدكاترة او المعلمات يقولوا حاجات مهمة وقت الدرس
خليكِ ذكية وسجلي معاها كل اللي تقوله,ولما ترجعي البيت انقليه بطريقة مرتبة في دفتر خارجي


* اشرحي وقت المذاكرة,لنفسك..لصحبتك..حتى لو للعرايس والدباديب
واتعاملي بالاسئلة وعيشي جو انك المعلمة,لان هالسئلة تساعدك كثثثيييررر وقت ما تبغي تتذكري معلومة


* الكافيين لا تكثري منه بحجة التركيز,لو صدعتي ارتاحي,ولو تعبتي مافيها مشكلة لو اخذتي اوف ليوم واحد
والنوم اهم حاجة,لا تسهري عشان تختمي..نامي عشان ما تضيع منك المعلومات 
وعشان مخك يصحصح وقت الاختبار ويقدر يسترجعها


* تأكدي انك لو بدأتي من اليوم الاول حترتاحي,اتركي التسويف والاهمال
واشتغلي على نفسك صح..بكرا حتندمي على وقتك اللي ضاع ودرجاتك اللي طارت

* واخيراً لا تنسي تذكري الله في كل خطواتك,وتستعيني به وتتوكلي عليه
في الاخير نحن ناخذ بالاسباب لكن القضاء والقدر بيده سبحانه وتعالى
وتأكدي ان الله ما يضيع تعبك وبتجني ثماره في يوم.